Estimados/as veciños/as, amigos/as e internautas

Quero darvos a benvida á nova páxina web do Concello de Cerdedo-Cotobade, que está concebida como a gran fiestra deste municipio de recente creación cara o mundo. Este espazo de Internet configúrase como unha peza máis no proceso de modernización desta administración local, sen dúbida unha das máis vangardistas de Galicia e de toda España por afrontar en 2016 un novidoso proceso de fusión entre os territorios deCerdedoe Cotobade do que xurdíu un concello máis forte, máis grande, con máis peso poboacional, con máis recursos e con máis servizos públicos.

Cerdedo-Cotobade é un municipio inquedo que busca oportunidades de futuro para os seus veciños e que pretende renovarse constantemente –e esta web é un exemplo máis– pero sen deixar de ollar ao seu pasado, de manter as súas tradicións, de defender a súa identidade e idiosincrasia e de respectar e poñer en valor a súa historia e a súa riqueza natural.

Agardo que nesta páxina web os veciños poidan atopar toda a información que precisan para as súas xestións, para o seu día a día e para atopar todos os detalles dos moitos servizos públicos que sostemos co esforzo de todos. Tamén espero que comecen a utilizala como canle de comunicación directa co seu concello a través da recén implantada administración electrónica, que lles outorgará facilidades e lles evitará desprazamentos na súa relación coa nosa administración local.

Tamén creo que este portal pode ser unha ferramenta informativa de primeira magnitude para os milleiros de visitantes e turistas que cada ano gozan das nosas terras. Os nosos montes, ríos e paisaxes, os nosos equipamentos, a nosa beleza, o noso patrimonio e a nosa cultura aparecen espallados pola web para seren máis coñecidos e que cada día creza máis o número de persoas que se achegan ao que, subxectivamente, é o concello máis bonito do mundo.

Grazas por estar aí e unha forte aperta.